O‘zbekiston milliy qadriyatlari va qadimiy urf-odatlarimizning eng yorqin ramzlaridan biri bo‘lgan Navro‘z bayrami har yili katta shodu xurramlik, yangilanish va birdamlik ruhi bilan nishonlanadi. Shu munosabat bilan O‘zbekiston Milliy universitetida “Olam nurga to‘lsin sen bilan, Navro‘z!” nomli yoshlar festivali keng miqyosda o‘tkazilmoqda.

Mazkur festival doirasida fakultetlar va talabalar turar joylari kesimida bir qator ma’naviy-ma’rifiy tadbirlar tashkil etilib, unda talabalar milliy qadriyatlarimizni chuqur his etishga, qadimiy an’analarni o‘rganib, zamonaviy talqinda namoyish etishga chorlanmoqda.

 Festivalning asosiy yo‘nalishlari:

 Tanlovlar va ko‘rgazmalar: Talabalar tomonidan milliy liboslar, hunarmandchilik buyumlari, pazandachilik namunalari va Navro‘z bayramiga xos an’anaviy bezaklar keng namoyish etildi. Ayniqsa, sumalak tayyorlash jarayoni, milliy raqslar va qo‘shiqlar ko‘plab mehmonlarda katta taassurot qoldirdi.

Ma’rifiy kechalar: Navro‘zning tarixiy ildizlari, xalq og‘zaki ijodi va adabiy merosimizda tutgan o‘rni haqida professor-o‘qituvchilar hamda talabalar chiqishlar qildilar.

Sport musobaqalari va chempionatlar: Yoshlar o‘rtasida turli sport bellashuvlari, milliy o‘yinlar — kurash, arqon tortish va boshqa musobaqalar o‘tkazilib, ishtirokchilarda jismoniy tarbiya va jamoaviylik ruhi mustahkamlandi.

Milliy qadriyatlarga e’tibor:
Festivalning asosiy maqsadi — talaba-yoshlarni Navro‘z kabi qadimiy bayram orqali milliy qadriyatlar, urf-odat va an’analarga hurmat ruhida tarbiyalashdir. Qadimiy ajdodlarimizdan meros bo‘lib kelayotgan tabiatni asrash, insonlar o‘rtasida mehr-oqibatni kuchaytirish, ezgulikni ulug‘lash g‘oyalari bugungi yoshlar qalbida mustahkam o‘rin egallashiga alohida urg‘u qaratildi.

Shu tariqa, “Olam nurga to‘lsin sen bilan, Navro‘z!” festivali nafaqat quvonchli damlar, balki milliy qadriyatlarni asrab-avaylash va yoshlar qalbida Vatanga muhabbat tuyg‘ularini mustahkamlash yo‘lida ham muhim ahamiyat kasb etmoqda.